نعاود نهدر مليح على التسجيلات النهائية الجامعية , ونتكلم فيها على التخصصات الشبه الطبية لي سقساوني عليها وكذلك على المقابلات الشفوية .
1- التسجيلات الجامعية النهائية :

- هذا العام التسجيلات النهائية الجامعية للناجحين الجدد ستتم عبر الأنترنيت.
- التاريخ تاعها ابتداءً من 08 إلى 18 نوفمبر 2020.
- كيفاش تعرف التاريخ بالضبط ؟ تلقاه في شهادة التوجيه تاعك
- وين نلقى شهادة التوجيه تاعي ؟
تلقاها في موقع التسجيلات الأولية https://www.orientation-esi.dz/
تدخل للحساب تاعك وتقوم بتحميل هاذيك الوثيقة لي فيها التخصص لي وجهوك ليه , كي تسجلها على حاسوبك وتطبعها رايح تلقى فيها تاريخ , هو التاريخ الخاص بالتسجيل تاعك .
- كيما قلت التسجيل تاعك في هذاك التاريخ رايح يكون عن طريق الأنترنيت.
وشنو هو الموقع تاع التسجيلات النهائية ؟ هاوليك :
https://progres.mesrs.dz/
ماهي بيانات الدخول لموقع التسجيلات النهائية الجامعية 2020؟
هي نفسها لي دخلتو بيها في موقع التسجيلات الجامعية الأولية ( خانة اسم المستخدم: رقم التسجيل في البكالوريا، وفي كلمة المرور: الرقم السري الموجود على كشف النقاط الأصلي للبكالوريا، مع مراعاة إدخال الحروف Majuscule & Minuscule )
الملفات لي يطلبوهالكم في الموقع تاع التسجيلات الجامعية اعمللها مسح ضوئي (scan) وطلعها في السيت .
بالنسبة لدفع حقوق التسجيل الجامعي 200 دج يا إما تدفعها بالبطاقة الذهبية، أو عبر البريد تروح لابوسط ( وتدي معاك رقم حساب جاري ccp لي رايح تبعثلهم 200 دج , غالبا تلقاه داخل موقع التسجيلات الجامعية النهائية )
- الملفات الأخرى لي ميطلبوهالكش تديها لاحقا للجامعة لي وجهوك ليها نهار تبدا الدراسة ( يعني ماشي شرط ضك , كي تروح للجامعة ان شاء الله ) .
خلاص فهمتو نورمالمو ؟ نتا لي راك تشوف فيا تسجل في الأنترنيت ماشي في الجامعة ..
* صحا نسقسيك ؟ كاين لي لازم يروح للجامعة باش يسجل ؟
انعم ايه كاين

2- التخصصات الشبه طبية :

الآن رايح نتكلم على الطلبة لي وجهوهم للتخصصات الشبه الطبية (باراميديكال ) , هاذ الطلبة تدخلو أولا لموقع التسجيلات الأولية
https://www.orientation-esi.dz/
تخرجو شهادة التوجيه تاعكم ( يعني الوثيقة لي فيها التخصص تاعكم )
رايحين تلقاو فيها وحد التاريخ
هاذ الطلبة لي وجهوهم للتخصصات الشبه الطبية التسجيل تاعهم رايح يكون حضوريا في التاريخ المدون على شهادة التوجيه ( يعني تروحو للمعهد وليس عن طريق الأنترنيت )
وشنو هو الملف لي تاخذوه معاكم ؟
نكتبلكم الملف لي كانو يسجلوه بيه في الأعوام الماضية
( يمكن ماراحش يشدو عليكم كامل هاذ الملفات وتحتاجو بعض الوثائق منها فقط والبقية تكملوها ممبعد )
أنا المهم رايح نجمعلكم الملفات بصفة عامة وحاجة ماتنقص منها :
- نسخة من شهادة البكالوريا ( وخوذ معاك شهادة البكالوريا الأصلية أيضا )
- الكشف الأصلي للنقاط الخاص بالبكالوريا
- 02 شهادة ميلاد
- شهادة إقامة
- 04 صور شمسية
- شهادة السوابق العدلية ( الصحيفة رقم 3 )
- شهادة الجنسية الجزائرية
- شهادتان طبيتان (طب عام وطب الأمراض الصدرية)
- نسخة مصادق عليها من وثيقة إثبات وضعية المترشح اتجاه الخدمة الوطنية (تأجيل-إعفاء)

- من هنا رايحين تلقاو مثال وشرح شامل على ملفات التسجيل في معاهد الشبه الطبي لي كانت في الأعوام الماضية :
https://www.bac35.com/t14885-topic

- ومن هنا تلقاو معلومات شاملة على تخصصات الشبه الطبي :
https://www.bac35.com/t12593-topic

3- بالنسبة للتخصصات لي تتطلب مقابلة شفوية :

كاينة وحد المرحلة تخص بعض التخصصات الجامعية فقط
وهي مرحلة ( اجراء المقابلات الشفوية والإختبارات)
هاته المرحلة تكون ما بين 06 إلى 10 نوفمبر 2020 ان شاء الله
الطلاب الذين تم توجيههم نحو المدارس العليا للأساتذة
عليهم التوجه نحو جامعاتهم لإجراء مقابلة شفوية في الفترة المذكورة في الأعلى .
التاريخ لي تروحو ليهم بالضبط تلقاوه مدون على شهادة التوجيه , لي رايحين تحملوها وتطبعوها من موقع التسجيلات الجامعية الأولية orientation.
بالنسبة للطلاب الذين تم توجيههم نحو ميدان علوم تقنيات النشاطات البدنية والرياضية فيتطلب منهم :
تقديم شهادة طبية تثبت الصحة الجيدة للطالب
ملاحظة :
- إن تعذر عليك الذهاب للمدرسة العليا للأساتذة للتسجيل , فيجب عليك التوجه لأقرب مؤسسة ENS اليكم ( يعني ماشي شرط لي بعثوك ليها)
- إن تعذر ذلك أيضا، يجب الاتصال بالمؤسسة الموجه اليها، عند شرح حالتكم سيتم اقتراح حل لكم.
لي راه حاب معلومات شاملة على هاذي الفترة الخاصة بالإمتحانات الشفوية والملف لي يديه معاه وماهو نوع الأسئلة لي يطرحوها يزور هذا الموضوع :
https://www.bac35.com/t11076-topic

نظن راني جاوبت على أغلب الأسئلة لي لحقتني

ملاحظة لأصحاب النسخ واللصق على الأقل اعمل بارطاج من الصفحة , أو حط المصدر ''اسم الصفحة أو رابطها'' لي نقلت منو احتراما لينا فقط , على الأقل الصفحة يتفاعلوا معاها أكثر ويستفادو كامل .
- خالد -
بالتوفيق للجميع ان شاء الله